Seánra Polannach, ina dtairgtear cuireadh don údar a bhfuil tugtha faoi deara i rith a s(h)aoil aige/aici a phlé, is ea an Leabhar Aibítre. Scríofa go hiondúil i bprós, tá sé athchóirithe i bhfoirm fhileata anseo. Míreanna dírbheathaisnéiseacha, mar aon le tuairiscí orthu siúd a bhfuil clú agus cáil bainte amach acu, a bhíonn faoi chaibidil go hiondúil ann. Lúbtar an dearcadh seo agus, cé go n-ainmnítear daoine a raibh baint acu le saolú dánta áirithe, is ar ghné fhileata an tsaothair a dhírítear. Toisc go bhfuil an seánra aistrithe go Gaeilge, ní aithnítear ach na hocht litreacha déag a bhain go traidisiúnta le haibítir na teanga sin.

Is file, drámadóir, scriptscríbhneoir agus leabhrógaí í Celia de Fréine. Tá ceithre leabhar filíochta i gcló aici: Faoi Chabáistí is Ríonacha (CIC, 2001), Fiacha Fola (CIC, 2004), Scarecrows at Newtownards (Scotus Press, 2005) agus imram : odyssey (Arlen House, 2010). I measc na ngradam liteartha atá buaite aici dá cuid filíochta tá Duais Patrick Kavanagh (1994) agus Gradam Litríochta Chló Iar-Chonnachta (2004). Bhain sí Duais an Oireachtais do Dhráma ilghníomh ceithre huaire. D'fhoilsigh Arlen House trí cinn de na drámaí seo in Mná Dána i 2009. Sa bhliain chéanna chuir Amharclann na Mainistreach i láthair léiriú cleachta den dráma Casadh a coimisiúnaíodh uaithi. Taispeánadh na gearrscannáin Lorg, Seal agus Cluiche, bunaithe ar dhánta léi, i bhféilte in Éirinn agus i Meiriceá i 2007 agus 2008. I gcomhar le Biju Viswanath scríobh sí an scannán Marathon a bhain an duais don script is fearr ag Féile Idirnáisiúnta Scannán Nua-Eabhrac i 2009. Sa bhliain 2009 léirigh Living Opera, i gcomhar le Opera Ireland, taispeántas den cheoldráma The Earl of Kildare, cumtha ag Fergus Johnston, ar scríobh sí an leabhróg dó. www.celiadefreine.com